خُدُوه في الميكروباص وودوه ع المديرية

تدوينة عن حادثة خطفي من قِبَل قوات الأمن يوم 9مارس2013.

مش هتكلم عن الضرب إللي اضربته .. ولا عن الإهانات إللي اتوجهت ليا لحين وصول أول توصية بحسن المعاملة وإللي تغيرت المعاملة على أساسها 180 درجة بعد أقل من ساعة من الحبس .. مش هتكلم عن الولاعة إللي اتاخدت مني بلطجة ولا عن الواد الغلبان إللي كان ممسوك معايا وإللي المخبر سرق منه موبايله .. مليش نفس بصراحة أحكي عن حواري مع الظابط إللي كان بيستجوبنا بطريقة غير رسمية عشان يعرف دماغنا عاملة إزاي عشان يعرف يرفع التقرير إللي هيتكتب على أساسه المحضر المتلفق .. ولا عن عقيد المباحث الجنائية إللي دخل وقاللي إنت شكلك محترم ومتخفش وموبايلك والتابلت بتاعك في الحفظ والصون .. ولا عايز أتكلم عن إنه كان هو نفس العقيد إللي كتب فينا نفس المحضر المتلفق إللي اترفع للنيابة بعد كده .. وإللي قومنا فيه بـ21 تهمة من ضمنها سرقة مدرعة وسلاح ميري خرطوش وضربنا بيه ظابط و2 مخبرين .. ولا هتكلم عن التقارير الطبية الجاهزة مسبقاً للمصابين بإنهم تمت إصابة أحدهم باشتباه ارتجاج وإصابة الآخر بكسر في الفك .. ولا عايز أنوه إن الإصابات دي مستحيل تحقيقها بسلاح خرطوش أصلاً .. ولا إن التقارير دي كانت جاهزة أمام النيابة بعد 36 ساعة من معاد القبض عليا مع إن خالد علي -أحد معتقلي نفس الأحداث ولكن في الجمعة 8مارس- فضل محبوس 19 يوم عشان طلب تقرير طب شرعي يثبت حالة التعذيب الفعلي إللي تعرضلها أثناء القبض عليه، لحد ما في الآخر اتنازل عن التقرير عشان يخرج لأهله .. بكفالة 5000 جنيه .. ولا عايز أقول الملاحظة الفشيخة بتاعة إن أحد الظباط اشترك في إعادة شخص مخطوف لأهله سالماً على حسب الكلام إللي على اليافطة إللي قدام قسم قسم سيدي جابر وإللي اتعلقت أثناء ما كنت أنا في زنزانتي وفي نفس الوقت إللي المفترض يكون فيه الشخص المذكور بالإسم والوظيفة راقد في المستشفى نظراً للإصابة الفشيخة إللي سببتهاله بسبب ضربه بطلقات الخرطوش.

مش عايز برضو أحكي عن إصرار المخبرين أثناء القبض عليا على ضربي أكثر وأكثر لما فضلت أزعق فيهم “أنا صحافة ياولاد الكلب” .. ولا عن عدم اهتمام سواء النيابة سواء ظباط كتير في مديرية الأمن لطلبي المساعدة في تقديم ما يثبت كوني صحفي حر وبشتغل لموقع إخباري لسه قيد الإنشاء فمنطقي جداً إني ميكونش معايا تفويض أو تصريح رسمي .. مش عايز أتكلم أصلاً على إسلوب تعامل الأمن مع الصحافة الحرة في مصر.

طيب نتكلم عن إيه ؟! العقيد إبراهيم مبارك إللي كتب فيا المحضر المتلفق لما طلب مقابلتي بعد ما خرجت وأصر إنه يقابلني أولاً قبل ما استلم حاجتي ؟! أتكلم عن بجاحته في الرد لما قولتله “انت كنت عارف كويس إني صحفي ومع ذلك لفقتلي محضر” فكان رده “أنا ملفقتلكش حاجة .. انت احمد ربنا إني كتبت إنك مثير شغب مش محرض ومحطيتلكش أي حاجة في الأحراز كانت كفيلة إنها تخليك تنسى الشمس شكلها عامل إيه” ؟! أحكي عن تاريخ الراجل ده عامةً في تلفيق المحاضر لمعظم إللي بيتمسكوا في مظاهرات في نطاق منطقة سموحة عامةً ؟! أنا أعرف 9 متلفقلهم نفس المحضر بتاعي .. فقط اختلاف في الأسامي وإصابات ضباط الشرطة العظماء.

أتكلم عن الشجرة إللي ولعت -لوحدها- فجأة في الميدان وطفا نارها الشباب إللي كانوا معتصمين في نفس المكان من سنة على خلفية أحداث مجلس الوزرا لمدة شهرين لأنهم هما إللي عارفين مكان حنفية المية إللي بيستخدمها الجنايني المسئول عن المشتل إللي في الميدان ؟! ولا عن عربية المطافي إللي جابها ناصر العبد عشان يتصور وهو بيتظاهر بإخماد الحريقة إللي هو ولعها أخمدناها إحنا قبله ؟!

[tweet https://twitter.com/El_Marakbi/status/310482446133129216]

ولّا أتكلم عن إللي اتسجل في بيانات إخلاء سبيلي بكفالة 1000 جنيه إني تم القبض عليا من أمام مديرية الأمن أثناء محاولة إتلافها ؟! مع إني ممسوك من شارع مصطفى كامل على بعد حوالي 100 متر من ميدان فيكتور عمانويل إللي هو على بعد حوالي 500 متر سور مبنى المديرية ؟! مش حاسس بصراحة عن نوع التغذية إللي باخدها عشان تخليني قادر أحاول أتلف المديرية من على بعد أكتر من نص كيلو !!

إللي عايز اتكلم عنه أكتر هو السجن ذات نفسه .. النظام إللي هتفنا في يوم إننا عايزين نسقطه .. عن النظام إللي لسه مسقطش واتطور وأصبح عنده القدرة على التعامل مع الحشود إللي أسقطته من سنتين .. الحشود إللي للأسف لسه متطورتش عن مرحلة يوم 25يناير 2011 .. عايز أتكلم عن دمنا الرخيص .. مستقبل كل واحد فينا إللي ملوش قيمة .. عن نظام بيتعامل معانا كمعترضين على إننا مجرد عدد في شريط الأخبار بيعدي بسرعة ..

على فكرة أي اشتباكات لازم يموت فيها ناس .. دا الطبيعي !!

ده كان كلام الظابط في الـ”دردشة الودية” إللي دارت بيننا في وقت أذان الفجر يوم الحد بعد ما اتمسكت بكام ساعة .. كانوا عايزين يشوفوا الشخصية المهمة إللي أهله وأصحابه عرفوا يجيبوله وسايط الدنيا والآخرة عشان يطلع وناصر العبد -شخصياً- مرضيش يطلعه.

العُهدة هُنا على كلام أحد الوسايط من كُبَرات البلد لما قال فيما معناه:

الواد ده بتاع مشاكل وعايزين نربيه شوية !!

النظام يا سادة لسه زي ما هو متغيرش .. لسه بيضرب خرطوش في الوش .. ولسه بيكدب ويتصنع صورة الضحية .. ولسه في ناس بتصدق كدبه وتصنعه .. النظام لسه لما بيحس بخطر من ممارسة بلطجته علناً بيأجر بلطجية يتهجموا على المظاهرات تحت مسمى “المواطنين الشرفاء” .. النظام إللي أقر الضبطية القضائية عشان يبقى عادي جداً المخبرين يمسكونا في المظاهرات بعد كده .. النظام إللي لفق قضية لحسن مصطفى .. إللي من سخرية القدر نفس وكيل النيابة إللي مذكور إسمه في القضية هو نفس وكيل النيابة إللي لفقله قضيته في نظام مبارك .. في شواهد كتير حواليك بتقول إن النظام هو هو .. متغيرش فيه حاجة غير الدقن والسبحة .. لو كنت مش شايفها فياريت تمسح النضارة.

التظام إللي بيقتل فينا كل يوم وإللي وصلت فيه الداخلية لدرجة البجاحة إنها تصرح لمتهم -ظلماً- في قضية إنهم كانوا يقدروا يلفقوله أي حاجة في الأحراز بس خافوا على مستقبله .. النظام إللي كل جهاته السيادية بتتعامل بطريقة الآلهة في عدم وجود أي رقيب على تصرفاتهم .. إسلوب القبض عليا أنا والتمانية الآخرين وإسلوب القبض على معظم المتظاهرين في مصر فيه أكثر من مخالفة كفيلة بإسقاط القضية ككل .. ولكن مع ذلك القضية مستمرة وفي انتظار عرضها ع المحكمة للبت فيها قضائياً .. النظام إللي فيه عصام مهدي لسه محبوس على ذمة قضية مُفَبرك فيها سرقة سلاح ميري مع إن الحرز الوحيد في القضية هو التابلت بتاعي .. النظام ده نفس نظام مبارك والحزب الوطني بالظبط .. الفرق الوحيد في الكارنيه إللي بتقضي بيه مصالحك .. واختلاف الشعار من “من أجلك انت” إلى “نحمل الخير لمصر”.

الحرية لكل المعتقلين.